
Tuni, Vaiphei Nam ading ah nikhua kipak um beplo, tepte phak: NTWebsite hawndawna chung ah Thucha hung luidawk thei ah ka um, pa Pathian chung leh NTWebsite siamdaw nading ah pan eila lakpiak leh a simtute zosia chung in kipak thu kahung puang hi.
Vaiphei kiti hi kum za bangjat ahem masang ah Nam khat ah a la um in, Manipur leh state chuam chuam ah I la khawsaknau leh Kristian sakhua I pom nau hi kum 100 val bang ahung hi tai. Khangthu I sim leh nidanglai ah I pi I pu teu nek-khawlna chu lo-nasep, chuleh mun vawt, mun-dap, thingtang gam in bu-le-balte, kawlbu chuleh thaichi chi chuam chuamte ala chiing in ala khawsau.
Nasep leh thagum paina’n insung, khawtangte ala enkawl ui. Khua gamla leh kinai ah chengte kivetua thei dan dan ah ki hetua in; kipakni, siatni ah ala ki lungsiat, ki homat leh ala kisawmdawl tuate ala hiu.
Zialai ah ki hotua dan: Taksa kimu/ki ve tua, midang apat ki kamsan, jan ah meisel det ah chuleh, aw ah ki uau tua tite hin thupha-thusia ala kihil tua sek ui. Khang hungchia zel in lekha zikthaw dan bang ihung hiau ah, post ah kithawttua, telephone ah kiho mat tua, Telex, Fax, Facebook, Mobile phone mangcha WhatsApp, Youtube chuleh Instegram tite bang hung um in, tuni tiang hinchu khawvel leh a pawlam ah thil um zosia hiattheina Website thupi tak takte I khutpek un I nei tau. Khang vangpha ihiu. Ziachuh ahi dungzui in Kum 10 tavang chiata khan Khawvaiphei.com hung bawldaw in ala um ah. Zutjawlo in a mang hiai hiai tai. Eihaw lakah phung thangtawm ah ala veina leh khawksak diak mi bangzat ahem te’n tu ah NT Website siamdaw lungtup ah nei in, hun, sum-le-pai, thapai khawk salo in ala buaipiu ah, taksua ahi nading ah ala ki pumpiak zosiate te chung in Vaiphei milip in kipakthu a gen uh hi I leibat uh ahi.
Khawvel khanto dungzui in, thil chuam chuam, lam chuam chuam ah thilbawl, thiamzilna chuleh nasep ah chualchum leh taisan ah I umlo nading in mi phakna tiang bek tawh kiton ah I um ngai a bang hi. Chenna, khawsakna, pau-le-hamte hung chuam in, kidang lumlet maleh Pu-khat suan ihinau tukchak zing leh su hing zing ihi thei na ding un; zia i dawithawu NT Website hi ki neisak chiat ding in I kichial ui.
Namkhat hina teptena: I hung kipatna, I innchen, lo-chen, pu-pa khankhua, I chawndan leh ki timatna hoipen chu aneu alian in zia I website mang ah I puakdaw thei zosiau, thillui, thilthak I thunlut leh phungvutu pan tei tei ding hi I mimal mawpuak nau in lathei chiat leu hin dawi a um hi. Vaiphei Nampi a ding ah khuam detdo ahi I dawisak hi.
NTWebsite damsawt hen!
Ka kipak hi.
SK Hansing,
Assam